CRS BAUCAU HALO KAMPANHA PREVENSAUN BA HIV/AIDS

Objetivu Realiza aktividade kampanha ida ne’e, atu bele fo informasaun i habelar informasaun relevante ho prevensaun moras HIV/AIDS. Liafuan hirak ne’e hato’o husi Chefe Office manager CRS Nasional Dili ‘‘Leoneto Soares’’ ba Jornalista RCLM iha kampu Ginazio Villa Nova, loron 21/8 iha kinta feira.

Leoneto Soares hateten katak “iha dalan ida atu promove oinsa ita bele hatene ita nia an liu-liu relevante ho moras HIV/AIDS nebe iha ita nia rai doben Timor-Leste, hodi nune’e bele fo inkorazen ba komunidade liu-liu ba Joventude sira karik hetan risku atu bele ba fatin VCT hodi halao testu atu bele identifika sira nia statu kona ba moras HIV/AIDS”.

Leoneto Soares informa mos katak, CRS hetan Suporta barak no iha mos parsseirus barak atu halo kolaborasaun ho Ministerio Saude iha Distritu Baucau, i CRS iha equipa ida ho naran PRE-EDUCATION, nebe oferese duni sira nia an, sai nudar voluntariamente atu fahe informasaun ba komunidade nomos ho parseiru barak mak hanesan liderasa lokal ne’ebe fo apoiu maksimu tebes no ida ne’ebe importante liu mak parte siguransa hanesan PNTL sira ne’ebe fo seguru ba akitividade ne’e.

Leoneto mos salienta tan katak Pre-education ne’e halao’o iha fulan Maio iha tinan ida ne’e nia laran, no iha tempo ne’ebe limitado maiba ho plano ne’be diak no koko halo duni kolaborasaun ba komunidade barak atu nune’e bele koneksu. Konsege to’o duni iha suco ba Sub-distritu Baucau-Villa laran, Sub- distritu Venilale , Sub-distritu Laga no Sub-distritu Vemasse, area hirak ne’e mak monta pre-edukador iha suku refere.

Leoneto mos hato’o katak iha obstaklo barak ne’ebe sira hasoru iha fatin refere tamba pre-edukador sira volontariamente halao’o aktividade hirak ne’e. Ho esforsu ne’ebe sira halo bele mos fahe duni informasaun ba komunidade no fo inkorazen ba sira atu ba fatin VCT. Oras ne’e dadaun ema ne’ebe ba iha Fatin VCT hamutuk ema nain nen nuluresin ona .

Alende ne’e Chefe Office Manager fo mos nia mensajem ba komunidade tomak iha sub Distritu ne’en nia laran tomak fokus ba Joventude sira ba maluk supir oan sira nebe halo viajem ba Dili, Lospalos ba fatin hotu-hotu karik kolega sira hetan risku i grupu jovem sira organizado halo tato, mensajem mak ne’e ‘‘ Tempo to’o ona ita atu koalia sai ita nia prolema no tempo to’o ona atu hatene ita nia Statu liu-liu iha fatin ne’ebe ita hatene mak bolo Center Voluntary Counseling and Testing ka VCT . Mensajem ida tan mak ita nudar kristaun ita iha dignidade, Maromak fo mai ita, desde moris iha ona dignidade ita tenki respeitu ida ne’e.

Iha tempo hanesan Regina Amaral nudar programa manager ba distritu Baucau informa katak moras HVI/AIDS, oras ne’e dadaun la iha aimoruk atu kura so iha deit amoruk ida ne’ebe ho nararan ARB nebe bele haneha deit Virus no hamenus deit Virus iha sistema resistencia isin.

Entertantu Regina mos hateten katak, sira nia equipa ne’e sei ba halo teatru i musika , hodi fahe informasaun iha suco Caibada-Uaimua, no iha loron sexta sei ba tan iha suku Triloka no aldeia Kaisidu iha suco tirlolo iha loron 22/08. No Programa hanesan ne’e mos sei realiza iha Distritu Viqueque iha loron 25-26 iha semana oin mai.

Iha parte seluk , Komunidade nebe partesipa iha eventu ne’e, Aljira Amaral tuir nia observasaun ba Programa CRS halo iha Kampu Ginazio villa nova, nia sente kontente tebes, tamba bele fahe informasaun ba komuinidade, " tamba dala barak komunidade lahatene kona ba moras HIV/AIDS ,ho sira nia prezensa hodi hatudu teatru no musika bele mos fahe informasaun". Iha parte seluk Aljira mos senti triste tamba iha eventu ne’e, ema ne’ebe partisipa ladun barak, tamba dala ruma informasaun nebe Parte CRS halo ladun perkore ba komunidade hotu, tan ne’e ema nebe mai partisipa la barak. Iha parte ida nia senti haksolok, tamba bele aumenta tan nia konsementu kona ba moras oi-oin hanesan HIV/AIDS, no bele koko ran iha Fatin CVT iha Ospital Referal Baucau hodi nune’e bele prevene moras HIV/AIDS.